Monseigneur, je receu hier votre lettre du XVIIe, responsive à la mienne du Ve. Vous

devrés avoir depuis receu deux ou troys des miennes, lesquelles me garderont de vous

faire du tout si longue responce. La verité est bien telle que vous dictes que j’ay

trouvé à mon retour de la court beaucoup d’affères, desquels je ne suys encor

dehors, toutesfoys, il fauldroit quils fussent bien grands s’ils me gardoyent

de m’aacquitter au moins en partie, de mon devoir en votre endroit. Je ne vous

diray rien davantaige du seigneur de Sainct-Romain, sinon qu’ayant tenu le

propos dont mescrivés au neveu de monsieur le premier president, il na rien

faict en cela, sinon pro caetera sua sapientia. De ma part, j’ayme mieux estre

comprins au nombre des presidens et conseilliers quil menace que s’il m’en

avoit excepté. Je doibs avoir icy à ceste chandeleur les colonels et

capitaines des bandes suisses, avec lesquels je m’informeray plus amplement

comme le faict de votre maison de Sainct-Saphorin passa, affin den prendre

quelque resolution. J’ay depuys aprins quil est bien vray que le conte de

Gaiasse estoit audit Sainct-Saphorin lhors que le desordre y adveint, et a

faicte, il y manda pour n’y ouser aller luy mesme, de peur destre offensé,

dautant que cestoit au quartier du regiment des Landres, cest-à-dire

des cinq cantons, avec lesquels il estoit mal. Surquoy, ledit colonel Heidt

m’a asseuré que certainement il estoyt si mal avec ceux desdits Landres

pour ses mauvais deportemens quil avoit belle peur destre battu ; et de fait

quil sen alla sans dire adieu n’y à lun, n’y à laultre regiment, ne seulement en

escrire aux colonel et cappitaines desdits Landres, dont ils sont tellement

depittés contre luy que si nous venions à avoir besoing d’une levée, ils

sont deliberés de reserver quils ne seront jamais plus commandés ne

conduictz par Italiens ; quant à ce que je vous ayescrit que j’auroys

grand envye de vous aller veoir ; certainement elle me croist tousiours

davantaige encor que j’y veoye tous les jours moins de moyens ; si nen

veux-je pourtant encor rompre du tout le dessaing, mesmes si je vous veoyes

[v] en paix de laquelle je diminue tous les jours lesperance et fault que je

vous dye que ce qui est advenu à La Rochelle a esté le plus mal à propos du

monde ; car encor que le roy le desadvoue et declaire estre bien ayse de ce

que ceux de ladite Rochelle ayent fait punition des autheurs, je veoy bien

deçà quil y aura bien affère que les huguenots ne les princes et peuples

protestans sen veuillent rendre capables ; il eust esté bon que tels

entrepreneurs se fussent repousés interdum etiam nimio studio valde

peccaturo ; cela m’a fort interrumpu tous mes dessaings dont je me reserve

vous escrire cy après plus specialement ; quant à ce que les huguenotz

se vantoyeny d’avoir des reistres, je cuyde vous pouvoir asseurer que ilz

disent en cela plus quilz ne pensent ou quilz se flattent et que jusques

icy, il n’y en a poinct dapparance, sinon que ledit faict de La Rochelle

apporta quelque changement es voluntes desdits protestans et vous

pouvés penser si par le moyen du commerce que nous avons aujourdhuy

en Allemaigne à cause du passaige de Pologne. Sa majesté peut estre

advertye de tout ce que y passe. Neantmoins, si de ma part jen puys

entendre quelque chose, je ne feray faulte de vous donner incontinant

advis. Lon avoyt quelque doubte que si le grand commandeur successeur du

duc d’Alve eust peu accorder avec le prince d’Aurenge, on eust peu faire verser

celle charge sur nous et appellent cela nous renvoyer la paume. Toutesfoys

j’ay veu quelques nouvelles par lesquelles il semble quils ne soyent si

prets d’accorder pour avoir esté descouvert que soubs pretexte de ce traicte,

ledit commandeur a voulu seduyre les capitaines dudit prince. Vous verrés le

traslat d’une lettre que le conte Palatin a escritte aux seigneurs de Basle

et pareillement aux seigneurs de Berne, de tous lesquels deux lieux.

J’ay recouvré l’aleman et mande au roy. Mais je vous supplie, monseigneur

pour certains respectz que cela ne soyt communiqué. Par là, on peut comprendre

que cest que les princes ont en la teste. En somme nous en sommes tous

[f. 50] lougés là que chacun pense qu’avec la religion va lestat, [, et son particulier]. Jay les mesmes nouvelles

que vous avés du passaige du roy de Pologne comme je vous ay aussi escrit

par mes precedentes. Le duc d’Alve doit estre deshormais en Italie. Il est de si

longue main et si naturellement ennemy du nom françoys, que si Don Joan avoit

quelque mauvais dessaing sur nous, il ne tireroyt pas à gauche et quant il

sera auprès de son maistre, il ne fauldra de lenflammer contre nous, quant

ce ne seroyt que pour cuyder s’excuser de ce quil n’a pas faict es Pays-Bas

tout ce quil vouloit en reiectant la coulpe sur nous ; et là-dessus, il fault

que je die quant je pense au peu dordre quil y avoit en Provence dernierement

que j’y estoys, tant pour le regard des places fortes que des galères, je ne

puys sinon craindre que comme lon dict la commodita non faccia lhuomo

ladro, attendu mesme d’un cousté la force que l’Espagnol se trouve avoir

aujourdhuy sur la mer, et de laultre les plainctes quil faict ouvertement

de nous. Je laisse les troubles que sont en ce quartier là le mauvais

mesnage, auquel sont les gouverneurs, entre lesquels je ne puys sinon plaindre

ce bon personnage contre lequel on a suscité le peuple qui naguères alloit presque

en procession à Notre Dame de La Garde pour prier Dieu pour sa santé et me

semble que son extrème vieillesse devoit faire prendre un peu de patience à ceux

qui entreprennent sur luy. Mais je croy vous en avoir escrit assés amplement

de Langres si d’adventure ledit Don Joan avoyt quelque dessaing, je vous

promects que je seroys sur tout en peine d’Avignon pour l’importance d’une

telle ville. Il est bien raisonable que ayant sa majesté prins la protection

du Contat, il soyt defendu pour le moins avec autant de soing que ses propres

pays et me souviens bien quil fust ainsi resoulu lhors que jestoys à la

court et s’il n’a esté faict, ce a esté très mal à propos, comme aussi je

trouve que ce a esté , [ajouté : , mal à propos] d’y laisser ainsi passer des forces estrangères

d’Italie, car tout cela nous pourroyt brouiller et empescher notre accord

si aucun a à se faire de tout cela on peut descouvrir beaucoup de mauvaises

intelligences. Dieu par sa grace y veuille pourvoir. Quant au seigneur qui estoit

[v] venu à Grenoble pour son procès, vous scavés comme son humeur est cogneue par

vos voysins. J’ay un très grand desyr de veoir monsieur d’Evènes bien accompagné

à son souhait. On ma dict tous les biens du monde de la damoyselle et ne suys

que marry quil ne l’aye peu veoyr, car j’ay opinion que cela leust peu

accorager. Monsieur de Langes y fera ce quil pourra de bone foy asseurés [mais]

monseigneur, quil vous est entierement serviteur et de tout le cœur. Quant

à laultre mesdisant, je cuyde que le sieur de Galifet vous aura rapporté ce que

mon frère luy en dict et ce que jen avoys dailleurs aprins de sorte (quil a]

beau sexcuser , mais il fault bien que telles langues ayent la mensonge [toute]

preste pour se dedire le pllus souvent, aultrement ilz ne pourroyent dire

quilz ne fussent accablés par quelquun de ceux quilz offensent à toutes

heurtes et à toutes heures.

Monseigneur, j’ay reservé à la fin comme vous à me condoloir du decès de madame

votre mère, non pas pour son regard, s’en estant allée hors de ce monde plaine

dans, d’heur et d’honneur aultant ce me semble que dame que j’aye jamais cogneue

et y ayant si bien et si sainctement vescu que nous ne pouvons doubter quelle ne soyt

là où nous devons tous desyrer d’estre. Mais je plains l’ennuy que vous,

monseigneur et tous messieurs vos frères en receuvrés n’ayant jamais veu enfans

porter plus d’honneur et de reverance à leur père ou mère que vous faisiés

très tous à celle bone dame, n’y mère qui porta sem[bla]blement plus de charité [que]

à vous ; et veux croire comme aussi il est conforme aux promesses de Dieu

que de ceste pieté est en partie procedé le bon heur de votre maison lequel

je nestime pas petit encor que vous ayés mené jusques icy une vie assés [travaillée]

encor qu’une bone partie desdits sieurs vos frères soyent morts assés jeunes, encor que

les vertus et merites de tant que vous estes n’ayent encor esté si bien recogneues

comme il appartenoit ; mais je repute ledit bon heur en , [, ce] que vous avés esté et estes

tous reputés de singulière prudhomie de pareille sagesse et valeur sans quil

y aye jamais eu que tout honneur en toute votre maison et tous ceux qui sont

morts, estans tous morts en si bons lieux et si vaillamment que leurs vies ne si

pourroyent jamais estimer avoir esté courtes. Pour votre particulier, il m’a

tousiours semblé que Dieu vous a faict entre aultres deux graces fort speciales :

l’une est de vous avoir baillé une lignée aussi belle et d’aussi bone esperance

que vous l’heussiés sceu souhaitter ; laultre que je ne vous ay jamais veu [advenir]

ne traverse, ne travail qui ne vous soyt reusés à honneur, dont vous avés

[f. 51] davantaige d’occasion de louer Dieu et vous consoler des afflictions, desquelles

il luy plaict vous visiter quelque foys. Quant au dernier poinct de votre lettre,

puys que vous vous reservés à vous en resouldre après que Dieu nous aura

doné quelque paix. Cela me donera encor plus denvye de vous aller

veoir en ce cas là. Cependant, je me recommande très humblement

à votre bone grace, en priant Notre Seigneur quil vous done,

monseigneur, en parfaicte santé très longue et très heureuse vie.

De Soleurre, le XXXe jour de janvier 1574.

- TOME : XXII

- F : 49::

- F : 50::

- F : 51::

- EXPEDITEUR : Bellièvre, Pomponne de, comte de Grignon

- DESTINATAIRE : M. de Gordes

- DATE : 1574-02-18

TYPE : reponse

CAT : reelle

- DATE : 1574-01-30

TYPE : expedition

CAT : reelle

- DATE : 1574-01-30

TYPE : expedition

CAT : affiche

- DATE : 1574-02-16

TYPE : reception

CAT : reelle

- LIEU : Soleure

TYPE : expedition

GPS : 47° 13′ 30" N ; 7° 32′ 15" E

- LIEU : Valence

TYPE : reception

GPS : 44° 93’ 33’’ N ; 4° 89’ 21’’ E

- HYPERLIEN :

- BIBLIOGRAPHIE :

- NOTE :